Raskun seneng rétung angger ana
pemuda sing esih peduli lan melu aktif ngramékna perayaan pitulasan. Wulan
agustus wis meh entok. Tanggal tua, tapi kegiatan sing judulé ngraméni, esih
krasa lan esih ana baé kegiatan. Salah sijiné pertandingan bal-balan urung
rampung. Wingi pas balik sekang kota, weruh wong lomba lari. Minggu kiyé ana
telu kegiatan resepsi ning RW sebelah, ning RWné déwék lan ning RT sebelah.
Kabeh ramé, kabeh pada kreatif.
“Inyong pas ngrungokna sambutan
Bupati Banyumas, ana sambutan nganggo basa ngapak, basa Banyumasan, inyong
seneng retung. Jen seneng. Tapi pas ana omongan better Banyumas, nyong langsung
kecewa. Jen kecewa ora etung.”
“Sebabé priwé kun.” Basta takon
mbari mbenerna njagongé.
Jawir nambahi, “Kecewané ko ora
ngaruh, Kun. Cumah.”
“Udu masalah ngaruh apa ora ngaruh
wir. Kye masalah idealisme.”
“Ih, ora wani-wani kweh aku
inyong angger masalah idealisme. Anu kepriwe kwe?”
“Apa langka basa Banyumas sing
artiné pada karo better. Better kwe basa inggris. Apa kudu nganggo basa inggris
supaya apik. Juara ujaré. Sapa baé sing gawé kuwe, better Banyumas, inyong ra setuju.
Ora pokoké. Apa maning kon nganggo kaos apa klambi sing ana tulisané better
Banyumas. Ora pokoké. Ora sudi!”
“Aja kesuh Kun, kesuhmu ora
krungu nduwur. Maring kabupatén nganah protes. Demo ya kena, demo déwékan.”
Jawir nyempaluk karo ndeleng langit sing
ora peténg tapi ora ana lintang.
“Kwe mungkin kaya kiyé Kun,” Basta
nanggapi Raskun, “Mungkin, kye tah anu mungkin, supaya bisa dé pas-pasna karo
gambar Bawor simbolé Banyumas. Dadi angger huruf ‘B’ kan dé polah kaya gambar
Bawor gampang.”
“Angger kaya kué, kan bisa nganggo
kata bagus, Banyumas Bagus, kan pada bae huruf ‘B’.”
“Ya yoh,” Basta karo Jawir
mantuhuk-manthuk.
“Tapi kan better karo bagus beda
artiné,” ucapé Jawir.
“Mbuh beda mbuh pada, pokoké kudu
nganggo basa Banyumas. Kudu!”
“Sing ngkudu-na sapa, Kun..”
“Inyong yah. Kudu!”
“Ya, yuh demo baé maring
kabupatén kon dé ganti Banyumas Bagus.”
“Yuh.”
“Ya ayuh”
“Ayuh koh, njagong baé.”
Tidak ada komentar:
Posting Komentar